As agrupacións locais de PSOE e BNG en Vigo criticaron este luns a ausencia de conselleiros ou conselleiras vigueses no novo goberno autonómico que se deu a coñecer nas últimas horas, o que evidencia o “abandono” da cidade olívica por parte da Xunta e o escaso peso político do PP local.
Así o trasladou a concelleira e deputada autonómica socialista Elena Espinosa, quen lamentou que “unha vez máis, non hai nin conselleiros nin conselleiras de Vigo” no goberno de Galicia. “Rueda volve desprezar á cidade, e mesmo converte en irrelevante ao PP de Vigo”, subliñou, á vez que destacou que os socialistas xa o advertiron “”.
Mentres, o BNG criticou que a configuración da nova Xunta demostra que o PP “non ten nada que ofrecer ao país” máis aló da “inercia e o continuísmo”, e que manterá a súa “política de abandono” cara a Vigo.
“Está claro que o feito de que non haxa ningún conselleiro ou conselleira de Vigo é a resposta de Rueda á derrota inconstestable que cultivaron na nosa cidade nas eleccións do pasado 18 de febreiro”, sinalou en redes sociais o portavoz municipal nacionalista, Xabier Pérez Iglesias, que lembrou que o BNG foi a primeira forza en Vigo neses comicios.
Así mesmo, incidiu en que tamén se demostra o “nulo peso político” do PP vigués, “descabezado e sen ningún proxecto para a cidade”, máis aló de ser “obediente máquina, eco da propaganda” da Xunta. “O que necesitan Vigo e Galicia non son cambios de caras nin intercambio de cromos entre consellerías, senón un cambio de fondo nas políticas”, engadiu.
