A CIG-Vigo chamou este xoves a manifestarse o próximo 10 de marzo, Día da Clase Obreira Galega, ante a “grave situación de precariedade e pobreza” que afecta á maioría social e para reclamar un “marco galego” de relacións laborais. O secretario comarcal do sindicato nacionalista, Alberte Gonçalves, e a membro da Executiva Comarcal, Raquel Pérez, compareceron en rolda de prensa para presentar a mobilización do domingo na cidade de Vigo, na que partirá unha manifestación ás 12.00 horas desde o cruzamento da Dobrada.
Esta marcha súmase ás convocadas ese día pola CIG en Santiago, e ás concentracións que terán lugar no resto de grandes cidades galegas. O lema da reivindicación este 10 de marzo será ‘Stop precariedade. Traballo digno. Por un marco galego de relacións laborais’, e encádrase na campaña “contra a precariedade” iniciada pola CIG no principio do ano.
Alberte Gonçalves subliñou que, nos últimos anos e por mor das reformas laborais, esa precariedade multiplicouse e a maioría social viu empeoradas as súas condicións laborais e salariais. Así, incidiu en que a situación se agravou “baixo novas formas de contratación”, como a fixa-descontinua, que modifican o estatísticas pero non melloran as condicións. O responsable comarcal da CIG en Vigo tamén criticou o abuso do período de probas por parte das empresas como modalidade de contratación con despedimento libre, o reforzo do papel das ETT ou o aumento de facilidades para a aplicación de ERTE.
Respecto diso, subliñou que nin se corrixiu a fenda de xénero, nin aumentaron os salarios nin se reduciu a inestabilidade laboral. “Faise realidade a figura do traballador e a traballadora pobres porque, hoxe en día, ter un emprego non garante que se poidan ter os ingresos mínimos necesarios para vivir con dignidade, e acceder a dereitos básicos como alimentación, enerxía ou vivenda”, advertiu.
Tras lembrar que nin o PP nin a coalición PSOE-Sumar puxeron freo ás políticas neoliberais e que a Xunta se limita a “aplicar a versión máis dura” desas políticas, Alberte Gonçalves chamou á mobilización porque “non se pode permitir que o resultado das eleccións galegas do 18F teñan como consecuencia un endurecemento das políticas reaccionarias, antisociais e antigallegas do PP”.
Ás portas do 10 de marzo, o responsable sindical reiterou a necesidade dun Plan Galego de recuperación económica, de industrialización, creación de emprego e reforzo dos servizos públicos; medidas para acabar coa precariedade e os baixos salarios; unha nova lexislación “que restitúa os dereitos perdidos”; e un “marco galego de relacións laborais” para “exercer un dereito democrático, como é negociar en Galicia nosas condicións de vida e os nosos salarios con plenas garantías”.
