Investigadores do Centro de Investigación en Nanomateriais e Biomedicina (CINBIO) participan no desenvolvemento de novas terapias para enfermidades inflamatorias articulares. En concreto, trátase da iniciativa Twinflag, financiada ao 100 % pola Unión Europea a través do programa Horizon 4.1 e coordinada cientificamente polo Centro de Medicina Innovador de Lituana, completando o consorcio a Universidade de Dublín e o CINBIO.
Cun orzamento total de 1,5 millóns de euros, o proxecto chegou ao CINBIO da man da investigadora María Dolores Mayán, de recente incorporación ao centro, onde dirixe o grupo Cellcom, no que se aplica a súa experiencia e a do seu equipo no ámbito da biomedicina para investigar vías de sinalización e mecanismos de comunicación celular dirixidos a identificar novas dianas terapéuticas para combater o cancro e outras patoloxías relacionadas co envellecemento, como a artrose.
Twinflag, cuxa parte viguesa conta con 400.000 euros, comezou en xaneiro de 2023 e terminará a finais de 2025. Busca identificar biomarcadores que favorecen o deseño de novas tecnoloxías para diagnosticar enfermidades inflamatorias articulares, como a artrose ou a artrite reumatoide, nos seus estados iniciais; ademais de para usalos como marcadores de prognóstico cando se realicen ensaios clínicos ou se administra un tratamento a un paciente. “Desta maneira, poderíase avaliar se o fármaco ou a estratexia terapéutica están a ser efectivos no paciente”, explicou Mayán.
