A candidata a reitora da Universidade de Vigo (UVigo), Carmen García Mateo, abriu este luns a súa campaña para as eleccións ao Reitorado que se celebrarán en maio, reivindicando a importancia de “avanzar con seriedade” e con “planificación”. A catedrática encabeza a candidatura Nós Universidade, unha das tres opcións que competirán nas urnas o vindeiro 6 de maio. Precisamente a idea de planificación, fronte á improvisación, foi un dos eixos máis repetidos do seu discurso, no que puxo o foco na solvencia, na capacidade de xestión e na necesidade de deixar atrás os “parches”.
Nun acto celebrado no auditorio da Facultade de Ciencias Económicas e Empresariais, García Mateo quixo tamén poñer en valor os 12 membros da súa candidatura, aos que definiu como un equipo “serio” e con “capacidade de execución”. A aspirante falou da necesidade de coidar o capital humano e de “situar a UVigo no lugar que se merece tanto por talento como por historia”. “Todas as persoas contan”, insistiu, reivindicando os meses de traballo previos que, segundo sinalou, lle permitiron recoller a voz dos distintos colectivos que forman parte da universidade.
Carmen García Mateo repasou tamén os principais eixos da súa proposta, entre eles o seu “compromiso” cunha xestión eficaz, a vontade de impulsar un proxecto compartido e a necesidade de abandonar o “minifundismo” para que a UVigo actúe como “motor de Galicia”. Noutras presentacións previas da súa candidatura tamén defendera unha universidade construída desde os tres campus, con máis autonomía e peso estratéxico para cada un deles.
