Responsables das federacións de industria e alimentación dos sindicatos CC.OO. UGT e CIG dirixíronse á dirección de WOFCO, nova dona de Fandicosta, para coñecer os pormenores da operación de adquisición e os proxectos e intencións futuras con respecto a esta empresa. Así, as centrais remitiron un escrito aos CEO da pesqueira viguesa solicitando un encontro, no que tamén participe o comité de empresa de Fandicosta, “á vista da relevencia deste proceso para as persoas traballadoras e a estabilidade laboral”.

Os sindicatos consideran “de suma importancia” poder “intercambiar información” e discutir eses proxectos futuros, así como “abordar calquera inquietude ou pregunta” por parte dos representantes dos traballadores. “Estamos seguros de que este diálogo facilitará unha comprensión mutua e contribuirá a un procesotransparente e xusto”, sinalaron desde CC.OO., CIG e UGT.