O goberno municipal de Vigo volveu a arremeter este martes contra o comité de empresa da concesionaria de bus urbano, Vitrasa, e apuntounos directamente, vinculando os danos rexistrados en varias decenas de buses por actos vandálicos, a persoas “moi violentas” da súa “contorna”.
O persoal de Vitrasa leva en folga indefinida desde o 25 de novembro, por un conflito laboral coa empresa (a negociación do convenio está bloqueada e os soldos conxelados desde 2020) que se arrastra desde hai máis de dous anos. No marco das protestas, os traballadores convocan manifestacións e marchas practicamente a diario por diferentes zonas da cidade, cos consecuentes problemas que iso xera no tráfico de Vigo.
O portavoz do goberno local, o socialista Carlos López Font, denunciou este martes novamente que esas protestas “están a romper a cidade” e que é “absolutamente intolerable o que fai o comité”. Así, Font atribúe as mobilizacións a “20 empregados sindicais” que actúan “polo seu propio interese” porque eles “teñen salarios elevados”, e “fano para danar á cidadanía”.
Segundo incidiu López Font “coas súas manifestacións” non só impiden aos cidadáns usar o transporte público, senón que tamén entorpecen os desprazamentos en transporte privado. Ademais, engadiu, “nesa contorna hai xente moi violenta que está a danar autobuses a diario”.
CRÍTICAS DA OPOSICIÓN
Ante estas manifestacións “inxustificables”, o grupo municipal do PP criticou que o goberno local está “a lanzar acusacións moi graves sen probas”, e esixiu unha “rectificación pública”.
“En lugar de disparar contra o persoal de Vitrasa, o Executivo municipal debería estar a traballar nunha soliución a este eterno conflito, que este mércores vivirá a súa enésima reunión sen que Abel Caballero dea a cara”, subliñou o edil ‘popular’ Fernando G. Abeijón.
Así, lamentou que o rexedor olívico “deixa claro que non pensa mover un dedo polos usuarios do transporte público” e tampouco se preocupa polos condutores atrapados nos atascos, tendo en conta que a competencia para habilitar alternativas de tráfico na cidade é municipal.
Pola súa banda, o BNG ha ido máis aló e esixiu directamente a dimisión de López Font, xa que “é gravísimo que o portavoz do goberno municipal e candidato número 2 do PSdeG ao Parlamento de Galicia por Pontevedra acuse de violento ao comité de empresa e ao persoal de Vitrasa, que levan 53 días en folga”.
Para o portavoz nacionalista, Xabier Pérez Igrexas, López Font cruzou ” todas as liñas vermellas” cun discurso “reaccionario e antisindical”. “Se lle queda algo de decencia e dignidade dimitiría hoxe mesmo”, subliñou.
Finalmente, o BNG lamentou que a “escalada de obscena complicidade” do goberno local coa concesionaria vitrasa chegase ata este punto, despois de meses de “descualificacións e provocacións” contra o persoal do servizo de bus urbano.
