A Escola de Enxeñaría Forestal da Universidade de Vigo (UVigo) lidera un proxecto dirixido a identificar zonas crave na prevención de grandes incendios, sinalando no seu estudo que dos preto de 30.000 lumes rexistrados en montes galegos entre 2011 e 2021, un total de 66 foron responsables de case a metade das hectáreas queimadas na devandita década.
Trátase así dos chamados “incendios forestais extremos”, lumes que cada vez teñen máis incidencia polos efectos do cambio climático, segundo explica o Diario da Universidade de Vigo (DUVI). Identificar zonas crave na prevención e diminución dos efectos destes grandes lumes nas zonas fronteirizas entre España e Portugal é o principal obxectivo do proxecto Firepoctep+, que lideran os investigadores da UVigo e no cal participan 17 institucións e entidades dos dous países.
Cofinanciado pola Unión Europea a través do Fondo Europeo de Desenvolvemento Rural, un dos eixos da iniciativa será localizar, ao longo da ‘raia’, zonas estratéxicas de xestión, puntos que resultan clave no comportamento destes grandes incendios. Cun orzamento de 3,3 millóns de euros, o proxecto ten como investigador principal ao profesor Juan Picos e dá continuidade a Firepoctep, que tiña como obxectivo deseñar unha estratexia común de actuacións preventivas para estes lumes. Unha das liñas do traballo previo foi o desenvolvemento metodolóxico para identificar zonas de xestión estratéxicas.
“Vaise a utilizar esa metodoloxía para definir cales serían as zonas estratéxicas e que habería que facer nelas“, sinalou Picos, explicando que o proxecto se estenderá ata 2026 e non só buscará puntos crave, senón que definirá que accións poden levar a cabo coa implicación dos axentes forestais.
