O goberno de Vigo resolveu designar de forma provisional xefe dos museos municipais ao historiador José Manuel Rey, que dirixiu o Museo Provincial de Pontevedra entre 2019 e 2023 e que foi cesado dese cargo polo PP, cando chegou ao goberno da Deputación Provincial. Este nomeamento faise en base a unha convocatoria para unha provisión temporal, dunha praza que leva vacante varios anos, e en tanto non se resolva a convocatoria e provisión definitiva da devandita praza.
Segundo figura na resolución da concellaría de Contratación de Vigo, do pasado 20 de decembro, esta provisión temporal, en réxime de comisión de servizos, ten a vixencia “estritamente necesaria para cubrir durante o período transitorio” ata a cobertura definitiva da praza e, en todo caso, por un máximo dun ano, prorrogable por outro máis.
Así mesmo, a contratación xustifícase en base a uns informes da concellaría de Patrimonio Histórico, dirixida por Carmela Silva (que presidiu a Deputación de Pontevedra entre 2015 e 2023), que apelan á “inaprazable e urxente necesidade” de cubrir o posto. Para esta provisión non se designou ningún tribunal senón que os candidatos debían presentar a documentación solicitada, cumprimentar unha serie de requisitos e, a concellaría interesada, sería a encargada de seleccionar de acordo a “criterios obxectivos e de idoneidade, antiguedad, nivel de coñecemento do posto, experiencia e formación”.
CRÍTICAS DO PP
Este nomeamento suscitou as críticas do grupo municipal do PP, que acusou a Silva de “tirar das súas habituais artimañas” para cubrir un posto no Concello, “en pleno Nadal, cunha clara intención de que pasase desapercibido”. O edil ‘popular’ Fernando González Abeijón afeou á primeira tenente de alcalde que alegue urxencia para cubrir esa praza, cando leva vacante “4 anos” e cuestionou tamén que o nomeamento veña avalado precisamente por dous informes da área de goberno que dirixe a propia Silva e “redactados ‘ad hoc'”. “Por que de súpeto era tan urxente dar este posto?”, preguntou
Segundo o PP, “estas maneiras lembran a aquel informe que se usou para botar ao novo equipo de goberno da Deputación da sede de Vigo, mesmo antes de que tomase posesión”, e insistiu en que Carmela Silva “aínda non superou a rabieta de perder a presidencia da institución provincial”.
