Bombeiros de Vigo colgaron esta semana un valo publicitario esixindo ao goberno local unha “solución” ao “grave problema do servizo”, reclamando máis efectivos para o corpo municipal.

A pancarta, que reza ‘Vigo sen bombeiros. Quen apaga ou lume?‘, é a segunda das accións de protesta do colectivo, despois de que no acto de aceso das luces de Nadal da cidade despregasen globos con mensaxes reivindicativas. “Haberá máis mentres esta corporación non solucione o grave problema do servizo”, reivindicaron, tras enviar un vídeo aos medios de comunicación urxindo unha solución ao conflito.

Os bombeiros de Vigo levan anos lamentando a falta de profesionais na cidade, asegurando que na maioría das xornadas o número de efectivos operativos sitúase por baixo dos 20, o mínimo establecido polo propio goberno local. Unha situación, din, “insustentable” que empeora en momentos de alta actividade, como ocorreu na madrugada do incendio mortal da rúa Alfonso X O Sabio, cando todos os bombeiros operativos tiveron que acudir ao momento, quedando un só telefonista recibindo as alertas de toda a cidade. Ese día traballaban 17 persoas, tamén menos dos 20 que marca a normativa.