Máis dun centenar de mozos vigueses participantes no Programa Cidadanía da Fundación Scholas Occurrentes déronse cita este venres 5 de outubro para dar a coñecer oficialmente ante autoridades locais as súas propostas, así como fallas no sistema escolar e o gran problema do acoso, dando fin a unha intensa semana de actividades na que primou “a cultura do encontro”, consigna desta fundación erixida polo Papa Francisco.
O acto de clausura, que tivo lugar no Colexio Jesuitinas Miralba de Vigo, contou coa presenza de D. José Manuel Pinal, Director Xeral de Centros da Consellería de Cultura, Educación e Ordenación Universitaria de Galicia; ou D. José María do Curral, Presidente Mundial da Fundación Scholas Occurrentes, entre outros.
Creadas dúas comisións estudantís, unha enfocada a tratar o tema das deficiencias no sistema educativo e outra ao tema do acoso, os mozos desenvolveron propostas que sorprenderon ao auditorio pola súa creatividade, pero sobre todo pola súa viabilidade.
Preocupados pola deserción temperá (18% dos mozos abandona de forma temperá os estudos) e a irregularidade dos logros (o 31% repetiu curso no ciclo de secundaria segundo fontes oficiais), os estudantes idearon un modelo de participación educativa co cal se lles dea voz, dunha maneira real e efectiva e non protocolaria.
Para iso propuxeron desde xa a elaboración dun documento fundacional e a creación dun consello estudantil que estaría composto por representantes de cada curso da ESO e Bacharelato escollidos por votación.
Deste consello sairían propostas concretas en canto a maneira en que se imparten as clases; e que fundamentalmente buscan que o proceso educativo sexa máis participativo, máis dinámico e máis acorde coa vida cotiá dos mozos, para estimular e recobrar así o interese do alumnado polo estudo.
“Conseguiremos así o espazo que necesitamos para facer parte da nosa educación e lograr unha maior participación e interese do alumnado nas aulas. Somos o que pensamos; pensamos o que percibimos; logo, non percibamos unha sociedade educativa na que non temos voz”, eran as palabras de Sergio Gándara (15 anos), estudante do Colexio Jesuitinas Miralba, e un dos portavoces do proxecto. “As pequenas vitorias… son pequenas, pero sobre todo… son vitorias”, puntualizou.
O equipo encargado do tema do acoso tamén presentou un programa cargado de proxectos e actividades que destacaba polo enfoque práctico e o uso das novas tecnoloxías, así como por recoñecer que o acoso transcende o contexto das aulas.
Entre as propostas máis destacadas cóntase a creación dun proxecto chamado “Rede de axuda”, co cal poder brindar acompañamento e contención ás persoas que senten en situación de acoso; iniciaríase nun barrio piloto da cidade (chamado “barrio seguro”), ao que se acollerían distintos espazos institucionais e comerciais sinalizados como “lugares seguros”. En diversas etapas, esta rede podería ampliarse e darse a coñecer mediante futuras campañas de promoción e divulgación.
No caso doutro tipo de acoso, como o que se dá nas redes sociais, nos espazos deportivos e nas aulas, os estudantes propuxeron diversas estratexias como a creación de blogues informativos, performances no espazo público, vídeos educativos con vocación viral, e a conformación de grupos nos diversos centros educativos para o impulso de iniciativas que propendan pola igualdade e o respecto.
A xornada concluíu coa entrega formal das propostas, co compromiso, por parte dos estudantes, de adiantar as iniciativas, e coa esperanza de que sexan estudadas e tidas en conta polas instancias pertinentes, a propósito de que varias delas requiren do apoio institucional para conseguir un maior alcance.
Vigo únese así á decena de cidades ao redor do mundo que acolleron o programa Scholas Cidadanía, do que xa participaron en España as cidades de Barcelona, Madrid, Tarragona e Valencia, e que ten como obxectivo principal fomentar un espazo de encontro e diálogo entre os mozos participantes.
