O Exame de Transparencia 2023 elaborado pola Fundación Fai sitúa á Universidade de Vigo entre as máis transparentes do Estado, e outórgalle o seu selo T de transparencia na máxima categoría (3 estrelas), ao cumprir totalmente 27 indicadores e parcialmente outro máis (obtendo 55 de 56 puntos posibles e un grao de cumprimento do 98 %).
O informe de transparencia voluntaria na web das universidades foi presentado este martes e avalía a transparencia e bo goberno de 49 universidades públicas e 26 privadas en España.
Segundo o devandito informe, o 93 % das universidades públicas españolas son transparentes e ningunha é considerada ‘opaca’, mentres que só o 23 % das institucións privadas (6 das analizadas) alcanzan ese recoñecemento.
Sobre os resultados obtidos pola Universidade de Vigo, a vicerreitora de Benestar, Equidade e Diversidades, Maribel Doval, sinalou que o informe “confirma a tendencia dos anos precedentes”, nos que a institución viguesa ha ido mellorando e consolidando o seu “compromiso” coa transparencia.
Para elaborar o informe a Fundación Fai analiza 10 áreas de información (plan estratéxico, persoal, políticas e goberno, consello social, entidades dependentes, oferta e demanda académica, persoal docente e investigador, alumnado, información económica e resultados), con 28 indicadores para as universidades públicas e 25 para as privadas.
A UVigo obtivo o selo T de transparencia na categoría de tres estrelas, que se outorga ás entidades que cumpren entre o 91 e o 100 % dos indicadores. “A obtención de selos como este incrementa a nosa reputación e permite que podamos ser socialmente máis responsables”, destacou a vicerreitora, que engadiu que os resultados empuxan á UVigo a “ser bos modelos para outros”, porque marcan a folla de ruta para outras institucións.
A de Vigo é a única universidade pública galega na listaxe de institucións co selo T de 3 estrelas, no que tamén están a Autónoma de Madrid, a Carlos III, a Complutense, as de Alcalá de Henares, Alacante, Burgos, Cádiz, Cantabria, Castela-A Mancha, Xirona, Granada, Huelva, Xaén, León, Málaga, Murcia, Valladolid, a Politècnica de Catalunya, Pompeu Fabra e o Rei Juan Carlos, así como dúas privadas (Católica San Antonio de Murcia e Internacional de Catalunya).
