A consulta popular organizada no Concello de Nigrán para elixir o sentido dunha rúa en Bouzavella –Panxón– rexistrou unha participación do 85,7% entre os 62 veciños chamados a votar.

O resultado desta consulta popular cualificado polo municipio pontevedrés como un “feito inédito practicamente” na política galega foi favorable a manter o sentido bidireccional na rúa a partir do cruzamento de Gorfáns.

A opción continuista impúxose por unha estreita marxe de cinco votos (29 a favor de manter e 24 que pedían cambiar a sentido único), segundo trasladou o concello de Nigrán, que xa organizara unha enquisa en liña sobre a permisividade dos cans en praias.

“Tomamos nota da situación, practicamente a metade dos veciños queren unha cousa e a outra metade outra, polo que isto reafírmanos en que non se pode tomar ningunha decisión radical nin inmediata, así que traballaremos para humanizar esta rúa respectando o resultado das hurnas”, sinalou o alcalde, Juan González.

Ademais, o goberno municipal avanzou que se celebrarán máis consultas populares para implicar na toma de decisións aos veciños. “Imos seguir nesta liña porque, ao final, non se pode tomar desde unha decisión que afecta a un determinado número de persoas sen preguntar antes a opinión de todos”, sinalou o rexedor.