Unha colisión por alcance entre dous vehículos rexistrada este mércores no municipio de Redondela saldouse cunha persoa ferida, que tivo que ser excarcerada. Segundo informou o CIAE 112 Galicia, o sinistro tivo lugar sobre as 10.45 horas no quilómetro 1 da PO-250, á altura da parroquia de Reboreda.
O 112 tivo constancia do accidente por unha chamada do 061, que acudiu ao lugar e alertou de que unha persoa implicada na colisión non podía saír polos seus propios medios do vehículo. Trátase dunha persoa usuaria de cadeira de rodas e que foi liberada polos bombeiros de Redondela. Ao lugar tamén acudiu a Policía Local e alertouse aos bombeiros do Porriño, que finalmente non chegaron a intervir. A persoa ferida, tras ser liberada, foi evacuada en ambulancia ao centro hospitalario de referencia.
