Traballadores da Madera Fiber, antiga filial de Faurecia no Porriño, concentráronse na mañá deste mércores ante a Delegación da Xunta en Vigo para pedir unha solución que garanta o mantemento dos máis de 100 empregos, xa que a empresa atópase en concurso de acredores.
Tras a protesta desenvolvida a semana pasada diante das instalacións da compañía do sector automobilístico, este mércores o persoal decidiu acudir á sede do Goberno autonómico na cidade para esixir “axilidade” por parte dos responsables políticos na procura dunha solución. Alí, pediron ao Executivo galego que atope “un investidor serio” que se faga cargo da empresa e retome a actividade, segundo recolle a CIG nun comunicado.
Os traballadores queixáronse da “ética” que, ao seu xuízo, leva a cabo Faurecia, que primeiro cobrou subvencións, despois pechou a planta e agora pretende que o persoal cobre da Administración, segundo rezaba a pancarta que encabezaba a concentración. O sindicado informou de que xa solicitaron unha reunión coa conselleira de Economía, Industria e Innovación, María Jesús Lorenzana, “pero aínda non se obtivo resposta”.
FEITOS
A situación, segundo explicaron os traballadores, vén dada despois de que en xullo de 2021 Faurecia comunicou aos empregados a venda da unidade produtiva ao grupo Callista Private Equity, tratándose dun fondo voitre alemán. En xaneiro de 2022 esta compañía tomou o control da planta do Porriño tras o pago dun euro, a pesar de que Faurecia ademais inxectou capital por valor de tres millóns, segundo denuncian os empregados.
Nese momento, os responsables do comprador reuníronse co comité informando de que traían un plan industrial para dar viabilidade ás instalacións. “A realidade que puidemos comprobar foi que nunca tiveron un plan industrial, nin investiron nada para telo, senón todo o contrario, dedicáronse a descapitalizar a planta, chegando mesmo a vender os terreos en xullo de 2022 por un prezo moi inferior ao valor de mercado de 2,4 millóns“, criticou o presidente do comité de empresa, Leonardo Suárez.
“En febreiro deste ano o fondo voitre alemán, seguindo o seu modus operanti habitual, abandona a antiga planta de Faurecia cedendo os activos por 3.600 euros a unha empresa romanesa xestionada por Rüdiger Wisser, personaxe que se define a si mesmo como ‘o enterrador’“, engadiu o presidente do comité. Segundo el, o novo propietario deixou claro que pretendía buscar un novo comprador ou pechar a planta e o pasado xoves, 14 de setembro, presentou o concurso de acredores.
