O home que picou as rodas de 11 coches en Vigo e cravoulle un coitelo na perna a unha testemuña que lle recriminou os feitos aceptou dous anos de prisión e unha multa duns 1.200 euros.
A vista de conformidade levouse a cabo este xoves no Penal número 1 da cidade olívica, aceptando o home dous anos de cárcere por un delito de lesións, a pesar de que nun primeiro momento Fiscalía solicitaba ata 4 anos de prisión.
Así mesmo, o vigués foi condenado a un delito de danos, polo que terá que pagar as reparacións dos coches, que superan os 1.300 euros, ademais de máis de 700 euros ao Servizo Galego de Saúde (Sergas).
Os feitos ocorreron na noite do 3 de xaneiro de 2022, cando “actuando con total desprezo pola propiedade allea”, o agora condenado picou as rodas de varios vehículos cun coitelo. Con todo, foi sorprendido por unha testemuña, polo que tratou de escapar, sendo perseguido. Nun momento dado, virouse e cravoulle ata dúas veces o coitelo na perna do home que o viu cometer os delitos.
