O presidente da Deputación de Pontevedra, Luís López, e a vicepresidenta do organismo, Marta Fernández-Tapias, selaron co presidente da Cooperativa de Armadores de Vigo, Javier Touza, un acordo para impulsar a edición de 2024 do Vigo Seafest, Festival ARVI do Peixe, tras a cancelación da edición deste ano (ao quedar deserto o concurso para a súa organización).
López garantiu o apoio da institución provincial ao evento e mesmo expresou a súa vontade de que poida estenderse a outros concellos da provincia. Este festival é, para o presidente da Deputación, “fundamental para estender a cultura gastronómica da provincia, pero tamén os produtos das rías, a industria pesqueira, os deportes náuticos ou de praia, e as experiencias á beira do mar”. Luís López tamén puxo en valor o papel da Cooperativa de Armadores como organización sectorial, e recalcou que “foron e son fundamentais para consolidar a cidade de Vigo como capital europea da pesca”.
