A Garda Civil investiga a aparición dun cadáver momificado, que foi atopado este domingo, colgado dun cable, nunha vivenda abandonada no municipio de Tui. Segundo informaron fontes da Comandancia de Pontevedra, o achado produciuse a última hora deste domingo, e foron uns nenos que estaban a xogar os que deron a alerta ao descubrir un corpo colgando no interior dunha casa abandonada.

O corpo, que pertence a un home sen identificar, atopábase momificado, e os investigadores estiman que a persoa levaba falecida varios meses. Polo momento, e aínda que o cadáver estaba colgado polo pescozo, non se descarta ningunha hipótese acerca das causas da morte, e será a autopsia a que axude a determinar se se produciu en circunstancias delituosas. Polo momento, non se puido identificar á persoa falecida e, segundo apuntaron desde a Garda Civil, non constan denuncias de desaparecidos, nin por esa zona nin en Portugal, que se puidesen corresponder co finado.