Catro persoas resultaron feridas de diversa consideración ao derrubarse unha árbore nunha zona de cámping das illas Cíes, segundo informa o 112.
Foi necesaria a coordinación entre medios aéreos, marítimos e terrestres para evacuar aos catro feridos. Dous deles foron trasladados a bordo do helicóptero de rescate ‘Pesca I’, de Gardacostas de Galicia, mentres que os outros dous tiveron que ser evacuados pola embarcación ‘Salvamar Mirach’, de Salvamento Marítimo.
Os feitos tiveron lugar ao fío das 04.50 horas da madrugada deste xoves. Nese momento, varios particulares chamaron ao 112 para informar dunha árbore caída sobre unhas tendas de campaña na zona de cámping das illas Cíes.
A pesar de que, inicialmente, os alertantes indicaban a posibilidade de que houbese persoas con dificultades para abandonar os seus aloxamentos, logo comprobouse que todos os feridos estaban liberados e accesibles.
Nada máis ter constancia dos feitos, o 112 puxo en marcha un operativo que contou coa intervención dos profesionais do 061 e dos equipos de Gardacostas de Galicia e Salvamento Marítimo. Ademais, co fin de coñecer as circunstancias do suceso, ata o lugar acudiron axentes da Policía Nacional e Local.
DOUS DOS FERIDOS XA FORON DADOS DE ALTA
Finalmente, os catro feridos foron evacuados ao centro hospitalario de referencia. Dous deles xa foron dados de alta, mentres que unha terceira persoa, un home italiano, permanece ingresado con prognóstico reservado, e unha muller de nacionalidade portuguesa atópase en observación.
Así o confirmou a conselleira de Medio Ambiente, Territorio e Vivenda, Ángeles Vázquez. A conselleira explicou que os feridos son de diferentes nacionalidades, aínda que parece ser que todos residen en Portugal. Os dous campistas que recibiron o alta son franceses, e os que seguen hospitalizados, son un home italiano de 32 anos e unha muller portuguesa.
Sinalou que a consellería mantivo contacto “desde o primeiro momento” con persoal do Parque Nacional Illas Atlánticas (do que forman parte as illas Cíes) e coa Consellería de Sanidade, e agradeceu non só a dilixencia do operativo de evacuación, que se produciu “en tempo marca”, senón tamén a cooperación do persoal do Parque Nacional e doutros campistas, entre os que había profesionais sanitarios de vacacións que prestaron “a primeira axuda”.
A conselleira lamentou o ocorrido, e sinalou que o cámping de Cíes, dada a súa excepcional localización, ten unhas “esixencias máximas”. “Toca ver como é a evolución (…) Ás veces, o factor sorte acompáñache, ou non”, sinalou.
CÁMPING
O incidente rexistrouse de madrugada, o que motivou momentos de tensión, tanto para evacuar aos feridos como para recolocar a varias persoas que durmían en tendas de campaña nesa zona do cámping.
Unha traballadora do establecemento informa de que todo o persoal pasou a noite sen durmir e tentando tranquilizar aos usuarios. A zona está acordoada e o cámping atópase á espera de que técnicos a inspeccionen, apunta esta traballadora.
