Un bebé de seis meses faleceu no hospital Álvaro Cunqueiro de Vigo este mércores por complicacións derivadas dunha meninxite, e tras ingresar uns días antes en estado grave.

A familia levou ao menor ao hospital o luns, onde ingresou por Urxencias “moi grave” cun cadro de meninxite. O bebé foi trasladado de inmediato á UCI do hospital vigués pero a súa situación empeorou.

Finalmente, sufriu unha sepsis fulminante e acabou falecendo, sen que o equipo médico puidese facer nada por salvarlle a vida. O bebé tiña postas todas as vacinas correspondentes á súa idade.