Unha queima descontrolada provocou o pasado venres un incendio a 10 metros dun grupo de casas habitadas en Vigo, saldándose cun total de 500 metros cadrados de matogueira alta calcinados.

Tal como informou a Policía Local, os feitos ocorreron na rúa Roupeiro, na parroquia de Matamá. Á chegada dos axentes os veciños trataban de sufocar as chamas, que foron axudados posteriormente polos bombeiros.

Nunha primeira inspección ocular, os funcionarios observaron que nunha zona próxima ao lume había unha bañeira vella con restos de queima no seu interior, parecendo o foco de inicio do lume.

Tras a investigación, localizouse a R.P.N., home de 60 anos de idade e veciño do lugar, que admitiu que queimara cartóns e papeis no interior da bañeira, ausentándose do lugar sen comprobar que o lume estivese apagado.