O Concello de Vigo atrasou o concerto de Beret no auditorio de Castrelos ata o martes 22 de agosto, a pesar de que estaba previsto que se celebrase a semana que vén, o sábado día 5.

Nun audio difundido aos medios de comunicación, o alcalde, Abel Caballero, informou deste cambio de data, a unha semana do evento.

“Iámolo a facer estes días, pero ímolo a trasladar ao martes 22 de agosto. Estaba previsto para o sábado día 5, pero mellor ímolo a facer o martes 22 de agosto”, dixo Caballero, sen dar máis explicacións do asunto.

O rexedor aproveitou para anunciar tamén a contratación da orquesta Panorama e o Combo Dominicano, que actuarán a partir das 20.00 horas en Balaídos o vindeiro martes, día 1 de agosto.