A sección quinta da Audiencia Provincial de Pontevedra, con sede en Vigo, xulgará o vindeiro mércores, día 19 de xullo, a un home que posuía ata oito armas de fogo no seu domicilio situado en Soutomaior, así como munición e uns 10 gramos de cocaína envolvidos en distintas bolsas de plástico pechadas.

O caso procede do Xulgado de Instrución número 1 de Redondela e, para o acusado, Fiscalía solicita ata 10 anos de cárcere por un delito de tenencia ilícita de armas prohibidas, un delito de depósito de municións e un delito contra a saúde pública na súa modalidade de sustancias que causan grave dano á saúde.

Tal como recolle o Ministerio público no seu escrito de acusación, foi o 14 de marzo de 2018 cando se procedeu a efectuar entrada e rexistro do domicilio do acusado, despois de que investigacións da Garda Civil constatasen que había indicios de que o home podería ter armas na súa casa.

Alí, foron achadas ata oito pistolas e outras armas, ademais de cartuchos, casquillos e demais munición. Tamén se atoparon diferentes doses de cocaína cuxo destino “era a venda a terceiras persoas para a obtención do correspondente proveito económico”.

Por iso, Fiscalía pide dous anos e medio de prisión por un delito de tenencia ilícita de armas; tres anos por un delito de depósito de municións, e catro anos e medio por un delito contra a saúde pública.