Axentes da Policía Nacional da Comisaría de Vigo detiveron a tres homes, presuntos membros dunha organización criminal itinerante, asentada na fronteira en Portugal e especializada en roubos en domicilios. Segundo informaron fontes policiais, este grupo asaltou unha vivenda da cidade olívica a mediados de xuño, de onde levaron xoias, reloxos, roupa e complementos de moda de marcas de luxo.

Os sospeitosos estaban asentados no norte de Portugal, preto da fronteira, e desde aí desprazábanse a diversos puntos da provincia de Pontevedra, onde supostamente cometían os roubos.

A investigación levou á Policía a establecer un posible percorrido de fuxida cara a Portugal, e activáronse os protocolos de cooperación internacional, que permitiron a identificación, localización e detención dos autores do roubo cometido en Vigo, onde saltaron o enreixado exterior dunha vivenda unifamiliar para entrar e facerse co seu botín.

No mesmo momento da detención, a Policía interveu 1.500 euros en efectivo, ademais de varios efectos susceptibles de ser utilizados para a comisión de roubos con forza. Aos sospeitosos, que xa pasaron a disposición xudicial, impútaselles un delito de roubo con forza, outro de falsidade documental e un de pertenza a organización criminal. A investigación mantense aberta, para aclarar a posible implicación dos detidos noutros roubos con forza cometidos en Vigo.