O goberno municipal de Vigo, o Valedor do Cidadán e os grupos políticos contarán cun total de 15 persoas como persoal eventual de libre designación (asesores, auxiliares administrativos, persoal de prensa ou protocolo, etc.), segundo confirmou o portavoz do goberno local, Carlos López Font, que subliñou que se seguiu a filosofía do “máximo aforro” con “dignidade” para que todos poidan desenvolver o seu traballo.
Nunhas declaracións remitidas aos medios, López Font explicou que, para designar a este persoal, aplicáronse os resultados electorais de forma proporcional, e aclarou que “a repartición dos medios económicos e humano” non é unha decisión do goberno local nin do alcalde. “Tomárona os cidadáns cando votaron o pasado 28 de maio, e cando decidiron darlle ao PSOE 19 concelleiros, ao PP 5 e a BNG 3”, apostilou.
Segundo incidiu, o goberno non quere “sobrecargar á cidade” con gastos “que se poden evitar”. “Seguramente somos a cidade de España que, proporcionalmente, menos orzamento dedica a persoal eventual”, defendeu o edil socialista.
Segundo explicou, a normativa permitiría dispor dun máximo de 27 efectivos eventuais, pero xa no anterior mandato o Concello acordou dispor só de 19, entre goberno e grupos municipais (deles, só ocupáronse 14 dotacións).
Para o mandato 2023-2027, establecéronse unha vintena de postos, pero uno deles está adscrito ao Valedor do Cidadán. Dos outros 19, o BNG contará cun auxiliar, o PP contará cun auxiliar e un asesor, e o goberno local disporá de 11 persoas xa que, incidiu López Font, renunciará a nomear 5 cargos. “Volven quedar 5 postos sen cubrir, mantendo a política de aforro fixada polo goberno”, subliñou.
