A Consellería de Infraestruturas e Mobilidade, a través de Augas de Galicia, eliminou un punto de vertedura de augas residuais urbanas sen depurar cara ao río Lagares na parroquia de Sárdoma, no concello de Vigo.
Segundo detallou a Xunta, este foco foi identificado o marco das inspeccións de rastrexo de puntos de vertedura levados a cabo polos técnicos do Programa de Control de Verteduras, dependente de Augas de Galicia, dando seguimento á denuncia notificada ao servizo de Emerxencias do 112.
Así, os técnicos do departamento autonómico identificaron a orixe do punto de vertedura nun colector da rede municipal de saneamento, no lugar de Salgueira. Ante a deficiencia observada, o persoal de Augas de Galicia comunicou aos técnicos municipais e á empresa concesionaria dos servizos de saneamento do Concello de Vigo, a necesidade de adoptar as actuacións oportunas para emendar a achega contaminante ao dominio público hidráulico.
Agora, nunha recente inspección á zona, os técnicos de Augas de Galicia confirmaron, mediante a revisión da rede de saneamento con trazador fluorescente, que as actuacións realizadas no colector de saneamento municipal permitiron a emenda do foco.
