Abel Caballero, alcalde de Vigo e tamén presidente da Federación Española de Municipios e Provincias (FEMP), vén de reunirse con José Guirao, ministro de Cultura no goberno socialista de Pedro Sánchez. Caballero asegura contar co apoio de ambos para o proxecto da Biblioteca do Estado na cidade olívica.

De forma moi similar ao relatado tralas anteriores reunións do rexedor vigués con outros ministros de Sánchez, asegurou atopar unha “receptividade” nova, inexistente antes da chegada do seu partido ao goberno do Estado. Caballero ve un cambio “radical”.

O alcalde tamén falou con Guirao sobre o cambio de estatutos no museo MARCO, “para adaptalos ás novas necesidades da arte contemporáneo na cidade”, defende. O representante do goberno estivo “completamente de acordo”.

Tamén falaron da candidatura das Cíes para Patrimonio da Humanidade, e do suposto “intento de bloqueo” da mesma por parte de Feijóo.