O presidente do PPdeG, Alfonso Rueda, reuniuse este mércores co candidato do PP á alcaldía da Cañiza, Migue Domínguez, e o seu equipo, dos que encomiou o seu “sentidiño e estabilidade”.

Así, o líder dos populares galegos sinalou que este domingo os veciños do municipio “só terán dúas opcións: ou o ‘sentidiño’ e a estabilidade dun goberno con experiencia, liderado por alguén que vive no municipio e que se preocupa polos seus veciños, ou seguir cun goberno que pensa máis nos seus intereses persoais que nos dos veciños”.

Polo seu lado, o candidato á alcaldía remarcou a necesidade de “deixar atrás” este catro anos “do goberno máis caro e ineficaz da historia da Cañiza”. “É o momento de deixar atrás catro anos de enganos, mentiras, manipulacións, promesas incumpridas, investimentos e oportunidades perdidas, proxectos paralizados, peches de servizos públicos e desatención ás familias”, afirmou.