A delegada territorial da Xunta en Vigo, Marta Fernández-Tapias, anunciou este mércores un novo concerto dentro da programación cultural promovida polo Goberno galego para o próximo verán, polo que o cantante arxentino Duki e o granadino Saiko actuarán o 26 de agosto no Peirao de Transatlánticos da cidade.

Tal como informou o Executivo autonómico, as entradas sairán á venda “proximamente” e incluirán a actuación do madrileño Reality e do DJ Tony Grox.

“Estamos de novo ante un dos grandes eventos musicais do verán en Vigo, con artistas recoñecidos na escena nacional e mundial. Chegan para dar continuidade ás actuacións de enorme éxito que os dous últimos anos contaron co apoio da Xunta a través do Xacobeo 21-22″, reivindicou Fernández-Tapias.

A Xunta subliñou que Duki é un dos artistas arxentinos máis escoitados no mundo e unha figura “de transcendencia internacional”. Nacido en Buenos Aires, foi nomeado en 2020 aos Latin Grammys. Este mes iniciou a súa xira en Estados Unidos, con concertos en Nova York e Miami.