Esta madrugada rexistrouse unha saída de vía en Ponteareas. Este accidente ocorreu pouco antes das 1,30 horas no quilómetro 645 da N-120 e foi un particular quen informou ao 112 do sucedido: un coche acababa de caer por un terraplén desde unha gran altura. Naqueles momentos, o alertador non conseguía divisar o vehículo sinistrado.

Pouco despois, o propio condutor implicado púñase en contacto co 112 desde o interior do coche e sinalaba que era incapaz de abandonalo e que cría que caera nunha leira.

De inmediato, desde o 112 solicitouse a colaboración de Urxencias Sanitarias de Galicia-061, do GES-SPEIS de Ponteareas e da Policía Local. Ao mesmo tempo, informouse os Bombeiros de Vigo, á Garda Civil de Tráfico, á Protección Civil do municipio e aos servizos de mantemento das estradas.

Os axentes da Policía Local comprobaron cando chegaron que o condutor conseguira saír polos seus propios medios do coche, que caera nun prado, tras o que foi evacuado en ambulancia ao centro hospitalario de referencia.