O incendio declarado a última hora da tarde deste xoves no municipio pontevedrés de Crecente quedou controlado ás 17,33 horas, segundo informou a Consellería de Medio Rural, que cifra nunhas 100 hectáreas a superficie afectada polas chamas. Para o seu control foron mobilizados catro técnicos, unha unidade técnica de apoio, 18 axentes, 53 brigadas, 33 motobombas, dúas pas, cinco helicópteros e dous avións.

O alcalde do municipio, Julio César García-Luengo, explicou a Europa Press que o incendio se orixinou pouco antes das 20,00 horas, “con tres focos”, entre as parroquias de Filgueira e Rebordechán, nunha área de difícil acceso. Desde aí estendeuse á zona de Tixosa, onde chegou a achegarse a dúas vivendas, pero “grazas aos medios aéreos” puido frearse o perigo.

As chamas tamén se propagaron pola zona de Ameixeira e o barrio de Bouzas, “que foi onde houbo máis problemas” durante a noite. De feito, efectivos de Garda Civil estiveron mobilizados por se fose necesaria a evacuación deste núcleo, aínda que finalmente non houbo que desaloxar nin a veciños nin a animais (no barrio de Tixosa hai unha granxa de cabras).

O rexedor de Crecente valorou que as devasas e o bo mantemento das pistas municipais evitaron males maiores, e sinalou que, na mañá deste venres, “a situación xa está controlada”. Así mesmo, do mesmo xeito que Medio Rural, apuntou a intencionalidade do incendio.

Segundo informaron fontes da Consellería de Medio Rural, o incendio quedou estabilizado ás 12,14 horas deste venres. Para o seu control foron mobilizados catro técnicos, unha unidade técnica de apoio, 16 axentes, 51 brigadas, 33 motobombas, dúas pas, cinco helicópteros e dous avións.