A Consellería de Infraestruturas e Mobilidade da Xunta, a través de Augas de Galicia, localizou e eliminou un punto de vertedura de augas residuais á ría de Vigo, na parroquia de Baredo, do municipio de Baiona.

Este foco de vertedura foi localizado no marco das inspeccións rutineiras levadas a cabo por técnicos do Programa de Control de Verteduras de Augas de Galicia, no ámbito territorial da demarcación hidrográfica Galicia-Costa.

Así, a orixe estaba nunhas instalacións da zona, onde se constataron deficiencias na canalización do entroncamento das augas residuais xeradas cara á rede de saneamento municipal, alcanzando a ría.

Os técnicos requiriron aos responsables da instalación a adopción de medidas correctoras para solucionar a situación, e eses responsables procederon a substituír o tramo da canalización onde se observou a deficiencia. Nunha nova inspección, puido comprobarse que o problema se emendou.