O xulgado do Penal 1 de Vigo acollerá este xoves unha vista contra unha muller acusada dun delito continuado de falsidade en documento oficial, por falsificar receitas para conseguir psicofármacos, e para quen a Fiscalía pide un ano e nove meses de prisión.
Segundo o escrito de acusación pública, a muller acudiu a varias farmacias dos partidos xudiciais de Tui e Vigo con receitas falsas co anagrama da Organización Médica Colexial (OMC), e conseguiu facerse con diversos medicamentos, supostamente prescritos por un facultativo: Rubifen, Lorazepam e Elontril.
A Fiscalía tamén lle acusa de falsear un informe médico co membrete do Sergas para acudir logo a centros privados e conseguir máis receitas, ao seu nome ou a nome de terceiros. Por estes feitos, acúsaa dun delito continuado de falsidade en documento oficial e pide para ela unha pena dun ano e 9 meses de prisión, así como unha multa de 1.620 euros.
