O alcalde de Vigo e candidato socialista á reelección, Abel Caballero, non acudiu este luns ao debate entre candidatos organizado pola CRTVG. O da cidade olívica daba inicio este luns á rolda de debates que a CRTVG organiza con motivo das eleccións municipais do próximo 28 de maio e que se retransmitiu de forma simultánea na Radio Galega e na Televisión de Galicia.

Á cita si acudiron a candidata do Partido Popular, Marta Fernández Tapias; o aspirante da Marea de Vigo, Rubén Pérez; e o candidato do Bloque, Xavier Pérez Igrexas. Preguntados respecto diso, fontes da contorna do alcalde de Vigo, limitáronse a sinalar que Abel Caballero xa non acudiu en anteriores campañas electorais ao debate organizado pola CRTVG.