Un mozo, S.B.I.K. de Murcia e 22 anos de idade, foi detido este pasado domingo en Vigo tras agredir á súa parella, de Colombia e 35 anos, e tratar de roubarlle o bolso.
Os feitos ocorreron sobre as 14,00 horas, cando a Policía Local recibiu unha chamada que alertaba de que varios viandantes retiñan a un home que tentara roubar un bolso a unha moza. Unha vez no lugar, os axentes entrevistáronse coa suposta vítima, que asegurou que o mozo era a súa parella e que tentara arrebatarlle o bolso violentamente, así como que a agredía de maneira habitual e desexaba finalizar a relación.
Ademais, as testemuñas manifestaron ver esa conduta e, ao sospeitar de que se podería tratar dun roubo, suxeitaron e inmobilizaron ao home, que foi detido pola suposta comisión dun delito de roubo e outro de violencia de xénero.
