Axentes da Policía Local de Vigo detiveron a un veciño da cidade, D.A.F., de 31 anos de idade, por quebrantar unha medida de afastamento da súa nai e, supostamente, agredila. Os feitos ocorreron na madrugada deste martes, cando o 092 recibiu un aviso para acudir á rúa Seixiños, onde se estaba producindo unha discusión nun domicilio.
Ao chegar á vivenda, unha muller explicou aos axentes que tivera un enfrontamento co seu fillo, que a golpeou. Dáse a circunstancia de que, previamente, e a uns dous quilómetros de distancia, esa patrulla identificara ao fillo.
Tras escoitar á nai, os axentes saíron en busca do home, do que comprobaron que ten unha orde de afastamento da súa proxenitora, emitida polo Xulgado do Penal 1 de Vigo. Finalmente, localizárono acazapado nunha zona de monte, entre unhas matogueiras a poucos metros do domicilio, e procederon á súa detención por quebrantamento de condena.
