Unha veciña da localidade pontevedresa de Redondela sufriu unha conmoción na mañá deste xoves tras producirse unha deflagración de gas na súa vivenda.

A pesar de que a explosión provocou poucos danos materiais, a afectada tivo que recibir asistencia sanitaria no lugar ante o impacto e o susto da mesma. Con todo, non foi necesario o seu traslado a un centro hospitalario.

Foi unha veciña a que alertou ao 112 Galicia, ao escoitar os berros e o pranto da muller. A partir de aí, deuse aviso aos integrantes do servizo local de emerxencias de Redondela, que fixeron as medicións correspondentes e comprobaron que os niveis estaban xa regulados. A deflagración produciuse por unha acumulación de gas no queimador da vivenda.

Cos membros do equipo de emerxencias local, colaboraron o GES de Mos e os axentes da Policía Local, á parte do equipo de Urxencias Sanitarias de Galicia-061 e os técnicos da compañía da subministración do gas.