O cantante sevillano Beret actuará no auditorio de Castrelos de Vigo o 5 de agosto, nun concerto enmarcado nas Festas de Vigo 2023 que organiza o Concello. Tal como informou en rolda de prensa o alcalde, Abel Caballero, Beret presentará a súa xira ‘Resiliencia’, onde interpretará cancións pop, baladas e outras con ritmos latinos e sons urbanos, entre outros.

O rexedor puxo en valor que o cantante fixo colaboracións con músicos da talla de Estopa, Malú ou Morat. Desta maneira, Beret únese ao resto de artistas xa anunciados que pasarán este verán por Castrelos, empezando o 8 de xullo con Andrés Calamaro, o 15 de xullo con David Bisbal, o 24 de xullo con Pablo López e o 15 de agosto con Ana Mena.

Ademais, as Festas de Vigo tamén incluirán espectáculos infantís. Abel Caballero anunciou que o 19 de xullo interpretarase ‘A ratita fachendosa’, a cargo da Charanga Teatro, mentres que o 12 de xullo será a quenda de Rayuela.