A muller acusada de prender varios focos de lume en zonas forestais de Nigrán, María Luisa A.A., no verán de 2020, aceptou este mércores penas que suman 18 meses de prisión e multas por 2.700 euros, nunha vista de conformidade celebrada na sección quinta da Audiencia Provincial de Pontevedra, con sede en Vigo.
Aínda que inicialmente a Fiscalía pedía para ela condenas que sumaban 12 anos de cárcere, produciuse un acordo entre a acusación pública e a defensa, e rebaixouse esa petición ata os 6 meses de prisión por cada un do tres delitos de incendio forestal. Ademais, tamén se acordou a suspensión da execución da pena por un período de 3 anos, a condición de que a muller non volva delinquir e pague as indemnizacións que se poidan establecer (no caso de que a Xunta ou algún veciño afectado reclame).
Segundo o escrito de Fiscalía, os feitos sucederon durante o mes de agosto de 2020, cando a muller, de 60 anos nese momento, foi sorprendida en varias ocasións prendendo lume á maleza e no monte próximo á súa vivenda, no lugar de Nandín.