A vicepresidenta segunda e ministra de Traballo e Economía Social, Yolanda Díaz, inaugurou xunto á súa homóloga portuguesa, a ministra de Traballo, Solidariedade e Seguridade Social, Ana Mendes Godinho, o Centro para a Economía e a Innovación Social na cidade portuguesa de Garda. Con este centro –o primeiro conxunto entre España e Portugal–, búscase dar resposta ás necesidades de formación no ámbito da Economía Social, como sinalan desde o Ministerio de Traballo e Economía Social.
A participación española, que será a nivel formativo, nace do compromiso entre os ministerios de Traballo portugués e o español en estreitar lazos, boas prácticas e políticas beneficiosas en materia laboral, como lembran desde o departamento de Yolanda Díaz que, na inauguración do centro, referiuse ao mesmo como exemplo de “política útil para alargar dereitos e mellorar a vida da cidadanía”. Ademais, como se destacou na inauguración, o centro de Garda pretende converterse nun referente en ambos os países das empresas e entidades da economía social (cooperativas, empresas de inserción, mutuas, sociedades laborais ou centros especiais de emprego, entre outros).
Por todo iso, a ministra defendeu que a posta en marcha do Centro para a Economía e a Innovación Social de Garda é unha aposta polo futuro e o presente dunha forma de entender a empresa e o emprendemento que achega progreso económico e cohesión social. “A política útil é cumprir cos compromisos que melloran a vida da xente”, afirmou. A Economía Social en España está integrada por unhas 43.000 empresas e entidades que constitúen preto do 10% do PIB, en total, uns dous millóns de persoas traballan directa ou indirectamente no sector.
