Unha avaría nunha arqueta provocou un incendio afectando a un cable subterráneo e deixou sen subministración eléctrica o centro Vialia de Vigo, e varias rúas, segundo confirmaron fontes de Naturgy e dos bombeiros de Vigo.

O fume que saía da arqueta fixo saltar as alarmas ao mediodía deste xoves, e ata o lugar desprazáronse efectivos do servizo extinción, así como persoal de Naturgy, que están a traballar para “illar” a avaría.

Fontes da empresa informaron de que a avaría mantén sen subministración ao complexo intermodal e comercial, e tamén están afectadas “rúas contiguas”. “Os técnicos traballan para restablecer o servizo canto antes”, engadiron.

O incidente ocasionou algúns problemas de tráfico pero non se rexistraron danos persoais.