Cristal Cougil quería vender un coche, o seu fillo animoulle a facelo por internet e coa excusa de axilizar a venda do coche un falso comprador solicitoulle copia da súa documentación incluído o seu número de conta bancaria para facer o suposto pago.

Apartir dese momento o falso comprador bloqueou os seus perfís en redes, para impedir a súa localización, motivo polo que Cristal interpuxo denuncia en previsión do que podía suceder, e que finalmente sucedeu.

Meses máis tarde recibiu o aviso da creación dunha conta bancaria fraudulenta en Madrid. A conta fora creada coa súa identidade por alguén que alugaba pisos inexistentes por internet quedándose cos cartos das supostas fianzas.

A súa sorpresa foi cando lle chamou a policía para que se presentase na comisaría de Vigo porque estaba en busca e captura. Un coche patrulla a levou esposada e detida, acusada de cometer numerosos delitos de estafa en Mallorca. Esposada e no calabozo, a policía decatouse xa de que se trataba de un erro, máis o procedemento penal continúa o seu curso.

Cristal atópase agora en liberdade condicional, acusada de cometer delitos de estafa e á espera de xuizo en Mallorca, localidade que asegura, nunca visitou.