O alcalde de Vigo, Abel Caballero, mantivo este mércores un encontro co delegado do Goberno en Galicia, José Ramón Gómez Besteiro, a quen trasladou a súa satisfacción polo apoio do Executivo de Pedro Sánchez á cidade, fronte á ausencia de investimento da Xunta e ao “sectarismo fanático” do presidente galego, Alfonso Rueda.
Esta é a primeira visita de Gómez Besteiro a Vigo como delegado do Goberno en Galicia, aínda que o encontro co alcalde non estaba na súa axenda pública nin na do rexedor. De feito, Caballero foi o único dos grandes alcaldes socialistas que non acudiu á súa toma de posesión o que se intrepretou como que Besteiro non tiña o apoio dos socialistas de Pontevedra. Por iso, a decisión do novo delegado do Goberno de verse con Caballero tenta amosar a “unidade do socialismo galego” con este nomeamento.
Nunha rolda de prensa, o rexedor olívico sinalou que ambos, a quen une “unha amizade de moitos anos”, abordaron varias cuestións, especialmente os fondos da UE que están a chegar á cidade, vía Goberno de España, para diferentes proxectos, que cifrou en 50 millóns de euros.
Por outra banda, explicou Caballero, informou ao delegado sobre o papel de Vigo no PERTE da automoción, no do Naval ou o proxecto da planta de semiconductores; do AVE Vigo-Ourense por Cerdedo; do estudo para o abastecemento da auga; a nova autovía ao Porriño; ou o saída sur ferroviaria.
“Quíxenlle transmitir que o Goberno de España é un aliado fundamental desta cidade, como non sucedeu nunca na historia“, proclamou, e resaltou que, fronte a este apoio, a Xunta non destinou “nin un céntimo” de axudas europeas ao Concello de Vigo, o que tachou de “escándalo”. “Debe ser que o señor Rueda, no seu sectarismo fanático antiVigo, cre que Vigo non é Galicia”, engadiu.
O alcalde volveu a pór como exemplo a obra da senda ciclable de Beiramar, que se está executando con fondos europeos, algo que Xunta e Porto pretenden “ocultar”, pondo un “xigantesco cartel” para “simular” que a obra a paga o goberno galego.
