Unha vela provocou un incendio no interior dunha vivenda en Vigo. A persoa que estaba dentro da vivenda saíu ilesa. Segundo informou o 112, os feitos tiveron lugar ás 14,00 horas nunha vivenda unifamiliar situada no lugar Senra de Abaixo.

O incendio sorprendeu á ocupante da casa, que estaba na ducha no momento no que se produciu o incidente. Ao parecer, unha vela prendeu nunha cortina e desencadeouse un incendio con efectos no mobiliario da cociña. Ademais, o fume tamén se estendeu pola vivenda e ocasionou danos.

Para sufocar o incendio, desde o 112 pediuse a colaboración dos Bombeiros de Vigo e tamén acudiron os axentes da Policía Local e os profesionais de Urxencias Sanitarias de Galicia-061.

ARDE UNHA ADEGA EN VILAMARTÍN DE VALDEORRAS

Por outra banda, pouco antes das 15,00 horas, o 112 rexistrou outro incendio en Vilamartín de Valdeorras. Foi nunha casa deshabitada, e o que se viu afectado foi unha adega e o seu contido: ferramenta e leña. Tampouco neste caso houbo persoas feridas.

Acudiron os Bombeiros de Valdeorras, membros do GES e voluntarios de Protección Civil.