Un home, F.J.B.M. de Vigo e 50 anos de idade, foi detido na madrugada deste mércores na cidade olívica tras supostamente agredir á súa parella lanzándolle un obxecto á cabeza.

Segundo informou a Policía Local, os feitos ocorreron sobre as 00,30 horas na rúa Romil. Foi a propia vítima a que alertou aos axentes de que fora agredida pola súa parella no domicilio que ambos compartían.

Unha vez no lugar, os funcionarios observaron que a aludida, de 43 anos de idade, presentaba un croque na fronte. Alí ela manifestou que a súa parella, no transcurso dunha discusión, tiráralle un obxecto á cabeza, causando as lesións. Por iso, o home foi detido como suposto autor dun delito de violencia de xénero.