Membros da Corporación Municipal de Mos, encabezados pola alcaldesa, Nidia Arévalo, e da asociación Aemos concentráronse este luns ante a sede da entidade empresarial, para expresar o seu rexeitamento ao “intolerable ataque vandálico” sufrido nas instalacións, que este domingo amenceron con pintadas en apoio de Rusia, e que foi reivindicado polo Comité Antifascista da Lourinha.

A rexedora lamentou esta acción, reivindicada por un comité “que presume de considerar nazifascista e terrorista ao pobo ucraíno“, “xustificando os seus actos delitivos como castigo a quen apoia a guerra”. E iso, precisou Arévalo, a pesar de que tanto o Concello como Aemos e a sociedade mosense están “en contra da guerra e en defensa da paz”.

A alcaldesa tamén criticou que os autores das pintadas tachan de “delincuentes e explotadores” a uns empresarios que son “o principal motor xerador de emprego, economía e industria” de Mos, e que colaboraron na recollida de axuda humanitaria para Ucraína cando comezou a guerra.

“Rechazadmos e denunciamos estes actos que fan apoloxía da violencia, da guerra, e da vulneración dos dereitos humanos e da autonomía dos estados soberanos”, proclamou a alcaldesa.