Axentes da Policía Local de Vigo detiveron a un veciño da cidade, C.R.R., de 45 anos de idade, como presunto autor dun delito de violencia de xénero, tras agredir á súa exparella en plena rúa, ao vela en compañía doutro home.
Segundo informaron fontes policiais, os feitos ocorreron na noite deste mércores, cando o 092 recibiu un aviso para acudir á rúa Salvaterra, onde testemuñas viran a un home agredir a unha muller e tirala ao chan.
Ao chegar ao lugar, a vítima saíu ao encontro dos axentes, e relatoulles que se atopaba na rúa acompañada por un home, cando ambos se cruzaron ao suposto agresor, que fora parella dela durante 6 anos.
Ao vela acompañada, iniciou unha discusión e encarouse co outro home. Cando a muller tratou de separalos, a súa exparella agarrouna polo pescozo e tirouna ao chan.
