En resposta ás declaracións realizadas polo Presidente da Autoridade Portuaria de Vigo, López Veiga, nas que defendía rotundamente que a competencia do peirao derrubado era do Concello e que por iso Porto de Vigo nin sequera a revisara, o conselleiro de Seguridade, Carlos López Font, vén de argumentar o contrario. Finalmente, só o proceso xudicial aclarará o acontecido.

López Font asegura que “lle corresponden ao Porto de Vigo todas as revisións e todo o mantemento dunha estrutura de formigón pilotada, realizada 15 anos antes da actuación Abrir Vigo ao Mar. O Porto sábeo perfectamente e por iso deu autorización para a “ocupación de diversas superficies portuarias” e para os concertos incluídos na 18º edición do Marisquiño”.

“O Porto de Vigo quere eludir as súas responsabilidades e a súa competencia plena desta
estrutura pero é tan evidente que non admite desculpa posible (…) Reiteramos que esta instalación é cualificada no Plan de Usos como zona portuaria naútico-deportiva e como todas as instalacións portuarias debe ser inspeccionada, mantida e revisada para que estea en perfecto uso polo Porto de Vigo”, lembra.

Polo tanto, segundo a argumentación do goberno local, “é unha zona patrullada pola policía portuaria e que dá servizo a un peirao náutico deportivo. Sábeo o presidente da Autoridade Portuaria, sábeo todo o Porto de Vigo e todos os que teñen un mínimo coñecemento… Toda a cidade sabe que iso é Porto de Vigo e sempre foi Porto de Vigo. O mesmo arquitecto encargado do proxecto de Abrir Vigo ao Mar recolle nesta actuación que fai un cubrimento de madeiras sobre un peirao existente”.

Para o PSOE, resulta claro que “o PP de Vigo e Núñez Feijóo están a seguir a estratexia de facer ruído, lles gusta o ruído. Ven que Vigo ten un imparable proceso de avance e mellora e tan so queren montar barullo para intentar parar a cidade. Pero o certo é que os feitos incontrovertibles sempre seguirán sendo que o peirao que se desplomou é unha dependencia portuaria, competencia e responsabilidade unicamente do Porto de Vigo”.

“Cabe lembrar tamén que o comportamento da cidade a noite do accidente foi excepcional e que unha parte moi importante do dispositivo foi dirixido polo alcalde da cidade. O
incuestionable é que o señor Feijóo esa noite non viu a Vigo e ignorou o sufrimento da xente afectada. Iso si, ao día seguinte apareceu na cidade para facer política partidista, que é o único que lle interesa”, concluíu.