A feira internacional Mindtech, da industrial do metal e tecnoloxías asociadas e organizada por Asime, reunirá a uns 300 expositores no Instituto Feiral de Vigo (Ifevi), do 20 ao 22 de xuño, e este venres celebrou o seu “acto de promoción internacional”.
O certame servirá, como destacou o director xeral da feira, Enrique Mallón, “como punto de encontro para a industria” e converteuse nunha cita “referente” para mostrar ao mundo as capacidades do sector no Polo Ibérico. Este ano, ademais, Mindtech abrirase tamén a mercados como Asia e África.
No acto deste venres, o vicepresidente primeiro e conselleiro de Economía, Industria e Innovación da Xunta, Francisco Conde, sinalou que a feira é o espazo idóneo para “xerar sinerxías” entre empresas tractoras e ‘startups’, e reivindicou o “xene industrial” que Galicia “leva no seu ADN”.
Así mesmo, tras insistir na importancia da colaboración público-privada, Conde lembrou que o sector metal representa o 20 % do PIB galego e, en 2022, representou o 35,4 % das exportacións.
Pola súa banda, a directora de Estratexia e Operacións de Boeing, Beatriz Ventero, impartiu un relatorio na que destacou que o investimento e as sinerxías de feiras deste tipo “son imprescindibles para xerar pegada industrial”.
Tamén interviñeron o alcalde da cidade olívica, Abel Caballero, que puxo en valor a “simbiose” entre tecnoloxía e industria; a presidenta da Deputación de Pontevedra, Carmela Silva, que apostou pola capacitación profesional e o investimento nunha industria “autosuficiente”; e o delegado do Estado en Zona Franca, David Regades, que apuntou a Mindtech como punto de encontro da “economía global”, nun contexto en que é necesario “reindustrializar” Europa.
MINDTECH 2023
Na edición deste ano a feira duplicará o número de expositores, e espera repetir o exito de anos anteriores, no que reuniu a miles de visitantes e a empresas dunha decena de países.
En xuño, novamente volverán darse citas expositores de todas as áreas de actividade e tecnoloxías punteiras do sector: automoción, aeronáutica, metalmecánica, estruturas, enerxías renovables, etc.
Así mesmo, de novo a ‘Startup Area’ reunirá tecnoloxías e modelos de negocio do futuro, cunha competición entre os proxectos máis innovadores; haberá encontros bilaterais para favorecer os contactos comerciais; e celebrarase unha nova convocatoria dos Mindtech Awards.
