Stellantis Vigo informou aos seus traballadores que volverá parar parte da súa produción a partir deste venres, día 17 de febreiro, debido á falta de aprovisionamentos.

En concreto, a quenda de noite do Sistema 1 da factoría olívica parará o venres, así como o tres quendas desta liña o vindeiro luns, día 20. A actividade renovarase o martes ás 06,00 horas.

“Por causas de forza maior, a consecuencia da falta de aprovisionamentos, suspéndese a actividade do Sistema 1 na quenda de noite do venres 17 e no tres quendas do luns 20 de febreiro”, indicou a empresa.

Precisamente este pasado mércores esta liña 1 da planta viguesa tamén parou a súa produción polos mesmos motivos. Nos últimos meses, Stellantis Vigo viuse obrigada a deter a súa actividade en innumerables ocasións por falta de pezas.