O comité de empresa de Vitrasa, concesionaria do bus urbano de Vigo, valora a convocatoria dunha folga indefinida a partir de marzo, tras meses de paros parciais para reclamar a actualización do seu convenio sen que nin a empresa nin o Concello movesen ” ficha”.
Así o trasladou o vicepresidente do comité, Fernando Pérez, en declaracións aos medios durante unha concentración de traballadores da concesionaria ante o Consistorio da cidade. Segundo lembrou, o alcalde non recibe aos representantes dos traballadores, a pesar de que o persoal está a realizar mobilizacións desde finais de 2020, cando caducou o seu convenio colectivo.
Os empregados reclaman actualizar o seu marco laboral para recuperar o poder adquisitivo perdido, e unha mellor regulación das súas condicións de traballo e descanso, xa que realizan xornadas de ata 10 horas e están condicionados por uns horarios que non se flexibilizan, aínda que as rutas estean afectadas por obras ou desvíos.
UN CONFLITO CON ORIXE NO 2020
Lonxe de achegar posturas, empresa e traballadores non sentan a negociar desde agosto do ano pasado. A concesionaria tentou aplicar un ‘descolgue salarial’, deixando sen efecto o convenio para poder rebaixar os soldos un 30 %, alegando perdas económicas.
Así mesmo, o rexedor deslizou nas últimas horas que os soldos dos empregados de Vitrasa están por encima dos estipulados no convenio provincial do transporte de pasaxeiros en bus. A esta consideración, os traballadores responderon lembrando ao rexedor que o seu soldo se basea no seu convenio propio.
CRÍTICAS DO BNG
Na concentración de traballadores que tivo lugar este xoves, participaron os portavoz do grupo municipal do PP, Alfonso Marnotes, e de Marea de Vigo, Rubén Pérez, así como o concelleiro do BNG, Xabier Pérez Iglesias, que previamente mantivo unha reunión cunha delegación do persoal.
Precisamente, Pérez Iglesias sinalou que o conflito xa dura máis dous anos, e que ten dous responsables, a concesionaria que “practica a pirataría empresarial”, e o alcalde e o seu goberno, que se situaron “de maneira deliberada” como “cómplices” de Vitrasa.
Sobre as declaracións de Caballero acerca dos soldos dos traballadores, o nacionalista replicou apuntando que “para salarios moi dignos, os do grupo municipal socialista, que están moi por encima das retribucións de traballadores e traballadoras”.
